Саудакент ауылдық мәдениет үйінің ұйымдастыруымен, ауылдың үлгілі отбасыларын құрмет тұтып, келешек ұрпаққа өнеге ету мақсатында «Отбасы-бақыт мекені» атты отбасы мүшелерімен кездесу кеші өтті.
Отбасындағы қарым-қатынас мәдениеті туралы түсінік беру маақсатында өткен кеш отбасы-Отанның бір бөлшегі екенін ұғындырып, өскелең ұрпақты жанұядағы сыйластыққа, адамгершілікке, инабаттылыққа, ынтымақ пен бірлікке, татулық пен ұйымшылдыққа тәрбиелеуді көздеді.
Байқадам ауылдық округ әкімінің орынбасары Жамбыл Құлыбеков: «Отбасы-қоғамның негізі, рухани және адамгершілік құндылықтардың қайнар көзі, еліміздің болашағының іргетасы. Баршаларыңызға зор денсаулық, отбасылық ошақтың жылуына толы ұзақ бақытты жылдар, сондай-ақ, бейбітшілік пен жақсылық тілеймін»,-деп ізгі ниетін білдіріп, арнайы қонақтарды жанұяның негізін қалыптастырудағы орасан зор еңбектері үшін ауыл әкімінің Алғыс хатымен марапаттап, сый-сияпаттарды табыс етті.
Ауылдың ардагері Марқаш Мизанбаев отбасы құндылығы туралы, отбасы игілігі үшін талмай еңбек ету керек екенін айтып, отбасы тәлімінің мәні туралы кеңінен тоқталып өтті.
Іс-шара қонақтары үлгілі отбасы Баулыбек Қанат пен Мұқашова Қорлан саналы, тәрбиелі ұрпақ тәрбиелеу туралы, келешек ұрпаққа салт-дәстүрлерді, әдет-ғұрыптарды сіңіру, бақытты отбасын құрудағы ата-ананың рөлі туралы өмірлік тәжірибелерімен ой бөлісті. Сонымен қатар, кездесу барысында қазіргі заманда болып жатқан түрлі оқиғалар, отбасы берекесі және бала тәрбиесі туралы сұрақтар қойылып, кеш қонақтарының пікірі мен кеңестері тыңдалды.
Саудакент ауылдық мәдениет үйінің әншілері С.Жұматаев, М.Тұрысбек, З.Ниязбекова, З.Досболовалар «Әжетайым», «Әкешім асыл адам», «Қос бәйтерегім», «Қос қанатым» атты әндерді шырқап, қонақтарға көтеріңкі көңіл күй сыйлады.
Отбасы-адам ғұмырының тірегі ғана емес, қоғамның да басты негізі.
«Отбасының жемісі-тәрбиелі ұл мен қыз» демекші, мақтан етер ұрпағымыз көп болғай!
Сәулет Есқара,
«Sarysý»
