Баланың шат күлкісі – өмірдің сәні, қоғамның байлығы. Ал сол күлкіні көбейтіп, балаларға қуаныш сыйлау – әрбір азаматтың ортақ міндеті.1 маусым- Халықаралық балаларды қорғау күніне орай орталық ұжымының ұйымдастыруымен қызмет алушы балалар мен олардың ата-аналары үшін бірқатар мерекелік және танымдық іс-шаралар өткізілді.
Мерекелік бағдарлама 29 мамыр күні ұйымдастырылған «Бақытты балалық шақ» атты танымдық-демалыс саяхатынан бастау алды. Балалар мен олардың ата-аналары Тараз қаласына арнайы барып, тарихи-мәдени орындарды аралап, көтеріңкі көңіл күйде демалыс өткізді.
Таңғы салқын самалмен жолға шыққан балалардың жүзінен ерекше қуаныш пен толқыныс байқалды. Олар үшін бұл жай ғана серуен емес, жаңа әсерлерге, жарқын эмоцияларға толы үлкен мерекелік күн болды. Сапар барысында балалар мен ата-аналар алдымен Тараз қаласындағы мешітке барып, рухани тынығу мен тағылымды әңгімелерге қатысты. Бұл кездесу жас ұрпақтың бойына ізгілік, мейірім және адамгершілік құндылықтарын сіңіруге бағытталды.
Саяхаттың ең қызықты бөлігі Тараз қаласының орталық саябағында жалғасты. Мұнда балалар түрлі аттракциондарға мініп, ойын-сауық бағдарламаларына қатысып, көтеріңкі көңіл күй сыйлайтын әсерлі сәттерді бастан өткерді. Әр баланың жүзіндегі шаттық пен қуаныш мерекенің басты көрінісіне айналды. Балалармен бірге ата-аналар да түрлі ойындарға қатысып, балаларының қуанышына ортақтасты.
Іс-шара барысында психологтар мен мамандар балалардың әлеуметтік қарым-қатынасын дамытуға бағытталған топтық белсенділік жұмыстарын ұйымдастырды. Мұндай шаралар балалардың өзара араласуына, қоршаған ортаға бейімделуіне және қоғаммен байланысын нығайтуға мүмкіндік береді.
Балалар мерекесінің жоғары деңгейде өтуіне демеушілік көрсеткен «FTM» ЖШС директоры Мұрат Сейтұлы Төлепбековке ата-аналар мен орталық ұжымы ерекше алғысын білдіреді. Әлеуметтік жауапкершілігі жоғары кәсіпкер балалардың Тараз қаласына барып-қайтуына арналған автобус шығындарын толықтай өз мойнына алып, мерекелік саяхаттың жүзеге асуына зор қолдау көрсетті. Балалардың жүзіндегі шаттық пен риясыз күлкі демеушілік көмектің қаншалықты маңызды екенін тағы бір мәрте айқын көрсетті.
Іс-шараға қатысқан ата-аналардың бірі Аппазова Алтынай өз әсерімен бөлісті:
«Балаларымыз үшін мұндай саяхаттардың маңызы өте зор. Олар жаңа орта көріп, құрдастарымен араласып, көтеріңкі көңіл күй сыйлайтын әсер алды. Бүгін балаларымыздың жүзінен шынайы қуаныш көрдік. Осындай игі шараны ұйымдастырған орталық ұжымына және демеушілік көрсеткен Мұрат Сейтұлына ата-аналар атынан шынайы алғысымызды білдіреміз. Балаларымыздың қуанышы – біз үшін ең үлкен бақыт», – деді.
Саяхат барысында балалардың қауіпсіздігі басты назарда болды. Жол бойы медицина қызметкерлері мен орталық мамандары балалардың денсаулық жағдайын бақылап отырды. Сонымен қатар патрульдік полиция қызметкерлерінің сүйемелдеуі ұйымдастырылып, барлық қауіпсіздік талаптары қатаң сақталды.
Осындай игі шаралар ерекше қажеттіліктері бар балалардың қоғам өміріне белсенді араласуына, олардың әлеуметтік бейімделуіне және өмірге деген қызығушылығын арттыруға үлкен ықпал етеді. Ең бастысы – балалар өздерін қоғамның толыққанды мүшесі ретінде сезініп, шаттыққа толы мерекелік күн сыйына ие болды.
Балалар – еліміздің болашағы, қоғамның ең қымбат қазынасы. Олардың әрбір қуанышты сәті, әрбір жарқын күлкісі – баршаға ортақ бақыт. «Бақытты балалық шақ» саяхаты қайырымдылық пен жанашырлықтың, әлеуметтік қолдау мен адамгершілік құндылықтардың жарқын көрінісіне айналып, балалардың жүрегінде ұмытылмас естелік болып қалды.
Балаларды қорғау күні орталық аумағында мерекелік думан жалғасын тауып, бүлдіршіндер үшін қуанышқа толы ерекше күнге айналды. Әсем безендірілген алаңда балаларды ертегі әлемінің кейіпкерлері қарсы алып, шаттыққа толы мерекенің шымылдығын ашты, балаларды ертегі және мультфильм кейіпкерлерінің бейнесіндегі мамандар қарсы алып, мерекелік көңіл күй сыйлады. Көңілді әуенмен биленген ортақ би бағдарламасы балаларды бірден шаттық әлеміне жетеледі.
Мереке барысында балалардың жас ерекшеліктері мен мүмкіндіктеріне сәйкес түрлі қимылды және танымдық ойындар ұйымдастырылды. Балалар дыбыстарды ажыратуға арналған тапсырмаларды орындап, секіру, шапалақтау және айналу сияқты қимылдар арқылы ойындарға белсенді қатысты. Сонымен қатар эстафеталық жарыстар, «Шамды өшір» тыныс алу ойыны және «Санға сәйкес жаңғақ сал» тапсырмалары өткізілді.
Шараның шығармашылық бөлімінде балалар түрлі-түсті борлар арқылы асфальт бетіне өз армандарын, бақытты балалық шақтың көріністерін бейнеледі. Әр баланың суретінен оның қиялы мен шығармашылық қабілеті көрініс тапты.
Мерекелік бағдарламаның шарықтау шегі орталық мамандары ұйымдастырған флешмоб болды. Балалар көрсетілген қимылдарды қызығушылықпен қайталап, көтеріңкі көңіл күйде би биледі.
Мерекелік бағдарламаның тағы бір әсерлі сәті – балмұздақ және тәттілер, балаларға арнайы сыйлықтардың табысталуы болды. Күтпеген тосынсыйлар мен жылы лебіздер балалардың көңілін ерекше көтеріп, мерекелік күннің ажарын аша түсті. Естелік суреттер түсіріліп, жарқын сәттер мәңгілік естелікке айналды.
Балалардың жарқын жүздері мен шат күлкілері ұйымдастырылған іс-шаралардың басты нәтижесі болды. Мұндай мерекелік кездесулер ерекше балалардың әлеуметтік ортаға бейімделуіне, өз мүмкіндіктерін көрсетуіне және қоғам өміріне белсенді араласуына мүмкіндік береді.
Балалар – еліміздің ең қымбат қазынасы. Олардың әрбір қуанышты сәті – қоғам үшін үлкен жетістік. «Бақытты балалық шақ» мерекесі балаларға шаттық сыйлап қана қоймай, мейірім мен қамқорлықтың, жанашырлық пен әлеуметтік жауапкершіліктің жарқын үлгісіне айналды.
Назира Шалбаева,
Сарысу аудандық мүгедек балаларды оңалту және бейімдеу орталығының директоры
