Құрметті жерлестер!
Сіздерді қазақ ұлтының рухын, сипатын бейнелейтін, ұлтымыздың мұрасына айналған Ұлттық домбыра күнімен шын жүректен құттықтаймын!
Бұл мереке-Ұлы Даланы мыңдаған жылдар бойы мекен етіп, өр рухын мәңгі сақтаған ата-бабаларымыздың домбыраға деген құрметінің жалғасы.
Домбыра-халқымыздың ерекше және айтулы тарихы, қазыналы аспабы.
Ұлттық домбыра күнінің белгіленуі халқымыздың домбыраға деген құрметінің көрінісі. Асыл қасиет пен өнеге-өсиетке толы ұлттық құндылығымыздың кұны қашан да жоғары. Тарихы сонау тереңге созылған домбыраның үні халқымызбен бірге жасасып келеді.
Сан тараулы оқиғаларды бастан кешкен ата-бабаларымыз дәуірдің тынысы мен заманның ағынын күмбірлеген күй арқылы жеткізген. Күй атасы-Құрманғазыдан бастап, Тәттімбет, Дина, Дәулеткерейлер домбыраның қасиетін ұғынып, келешек ұрпаққа мұра етіп қалдырған. Адам жан-дүниесінің сарайын ашып, сырлы сазға жетелейтін күйдің әсері де бөлек. Бірде Құрманғазының «Адайын» естігенде тұлпардай арындап, құйғыта шапқың келсе, Дина апамыздың «Тойбастар» күйі бойыңды еріксіз күш-қуатқа бөлейді. Тәттімбеттің сырлы күйін тыңдап, муза мен мұзар шыңға ұмтылып жатасың. Міне, таза табиғи талант, ғажап әсер.
Күйшілерден бөлек, жыршы-термешілердің, әншілердің өзі-бір төбе. Олардың әрқайсысының шығармашылығы-туған жер тарихының бір бөлшегі. Ұрпақтан ұрпаққа жеткен құндылығымыздың ел үшін маңызы зор. Боямасыз өмірдің сыры мен қырын ұқтырып, көңілге сан ойларды салатын ұлттық аспаптың ұрпақ үшін берері мол.
Ауданымыздың өнер, саз мектептері де өнерлерін көрсетіп халықаралық, республикалық, облыстық күйшілер байқауларында жүлделі орындарға ие болуда.
Ұлттық домбыра күнінің белгіленуі жастарымыздың ұлттық өнерге деген ықыласына, домбыраға деген қызығушылығының артуына игі әсер етеді. Ұлттық құндылығымызды ардақтап, айбынды ұрпаққа насихаттау-басты парызымыз болып қала бермек.
Ардақты ағайын!
Мәдениетіміздің мәйегі, дәстүріміздің діңгегі, жүрек тербеткен сазды үні- домбырамыз мәңгілік жасай берсін. Домбыра-біздің ұлттық өнеріміздің мәртебесі, ұлтымыздың мерейі биіктей берсін!
Шаттық Мұсабеков,
аудандық мәслихаттың
төрағасы
