Тәуелсіздік ақ білектің күшімен, ақ найзаның ұшымен ата-бабаларымыздың егемендік үшін күресімен ғасырларға ұласқан асыл арманына жеткен күн. Тәуелсіздік күні – кеңдігінен ұшқан құстың қанаты талған, жүгірген тұлпардың тұяғы тозған ұланғайыр жеріміз – Ұлы дала елінде Тәуелсіз мемлекет құрылғанын бүкіл әлемге жариялаған – ұлы күн.Тәуелсіздік жұлдызды 34 жылда ақ түйенің қарны жарылған, төрт құбыламыз теңеліп, көк туымыз көкте желбіреп, кең байтақ жазиралы далада қыран құстай қалықтап, тұғырға қайта қонған күн. Бүгінгі күн даламыз – дәнге, өрісіміз – малға, отбасымыз – жанға толған күн. Сондықтан, қазақстандықтар үшін Тәуелсіздіктен артық қасиетті де қымбат ештеңе жоқ
Міне, тәуелсіз ел болғанымызға 34 жыл толды. Осы аз уақыттың ішінде мемлекет басшысының сарабдал саясатының арқасында қол жеткізілген нәтижелер Қазақстанның әлемдік қоғамдастықта өзінің лайықты орнын алуына мүмкіндік берді.
Желтоқсанның ызғарымен келген Тәуелсіздіктің біз үшін орны қашан да бөлек. Сондықтан да «толарсақтан саз кешкен» батыр бабаларымыздың әр жылда төгілген қанының, ұлы мұраттар жолында құрбан болған асыл азаматтарымыздың асқақ армандарының арқасында қол жеткізген Тәуелсіздікті біз әрқашан мақтан тұтып, қастерлей білуге тиістіміз. Бұл біздің азаматтық парызымыз.
Баршаңызды келе жатқан Тәуелсіздік мерекесімен шын жүректен тағы да құттықтаймын! Барша шаңырақ баянды бақ-дәулетке кенеліп, елімізде ынтымақ салтанат құрып, ырысымыз ортаймасын! Тәуелсіздігіміз тұғырлы, бірлігіміз баянды, еліміз еңселі болсын, ардақты ағайын.
А. Жолмаханова, аудандық орталықтандырылған кітапханалар жүйесінің директоры
