Иә, қарттарын құрметтеп, қадірлеген ел, қазыналы ел. Қазақта «Ауылыңның қасында төбе болса ерттеулі тұрған атың, ауылында қария болса жазулы тұрған хатың» деген керемет пәлсапалық тұжырым бар. Қазыналы ел болуға бет бұрған қоғам қарттарын ардақ тұтып, қарттардың, абыз ақсақалдардың ақыл кеңесін тыңдап, олардың өмірден көргені, білгендерін естіп, жинаған тәжірибелерімен бөлісіп, қолдан келгенше оларға құрмет көрсетіп, сый-сияпат жасайды. Біздің ауданымызда да қарттарға, жақсы үлкен аға буынға ізгі ниетті шаралар атқарылып жатқанына аудандық ардагерлер кеңесі ризалық білдіреді. Бұл істе жергілікті атқарушы органдардың, мекеме, кәсіпорындардың демеушілік іс-шараларын айтып өтуге болады. Осы орайда Сарысу аудандық ардагерлер ұйымында 5000-нан астам ардагер тізімде бар. Олар 1 аудандық, 1 қалалық және 9 ауылдық ардагерлер ұйымдарына тұрғылықты жері бойынша тіркелген. Аудандық ардагерлер кеңесінің құрамында 25 ардагер бар. Осы ардагерлердің бос уақыттарын тиімді өткізуіне, отбасылық жағдайларының дұрыс болуына, денсаулықтарының қалыпты болуына ардагерлер кеңесі мүмкіндігінше көңіл бөліп, қажетті іс-шараларды атқарып отырады. Осы мақсатта ардагерлер аудан көлемінде өткізіліп жатқан мәдени-көпшілік, мемлекеттік мерекелік шараларға қатысып, қажет жағдайда ақыл-кеңестерін айтып отырады. Жыл сайын аудан әкімдігінің және демеушілердің көмегімен қасиетті Түркістан қаласына 20-30 ардагер туристік сапармен барып қайтты. Қасиетті Ораза айында, Құрбан Айт мерекесінде ауыз бекіткен ардагерлерге, қарттарға бірнеше ауызашар, құрбан шалу ұйымдастырылады. ҚР Парламентінің депутаты Гүлдара Алданышқызы Нұрымованың қолдау-демеуімен «Меркі- Мейірім» шиапажайына 20 ардагерді 50 пайыздық жеңілдікпен демалуға, ем-дом алуға мүмкіндік жасадық. Үстіміздегі жылы ауданымызда ҰОС жеңістің 80 жылдық мерекесіне орай «Жеңіс туы желбіресін» атты аудандық фестиваль өткізілді және облыстық ардагерлер фестивалінде біздің ардагерлер вокаль, хор және ұлт аспаптар ансамблі номинациясында бас жүлдеге ие болғанын ризалықпен атап өтуге болады. Жылда қарттар күніне орай ардагерлер арасында аудандық спартакиада өткізіліп тұрады. Биыл да 30 қыркүйек күні дәстүрлі спартакиада өтпекші.
Жақын арада мемлекет басшысының «Заң мен тәртіп» жөніндегі бастамасын қолдаған аудан, қала әкімдіктерінің ұйымдастырған 20-дан астам оқу орындарындағы жиналыстарға қатысты. Ардагерлер аталмыш жиналыстарда қоғамдық тәртіпті сақтау, үлкенді сыйлау, кішіге ізет жасау, отбасындағы бала тәрбиесіндегі ата-ананың рөлі туралы өздерінің өмірден көрген-білгендерінен көңілге түйгендерін сөз етті. Алдағы уақытта бұл шара жалғасын табатын болады.
Аудандық ардагерлер кеңесі белсенді өмір салтын ұстанып, мәдени көпшілік шараларды ұйымдастыруға жақсы атсалысып жүрген ардагерлерді «Сарысу ауданының құрметті ардагері» деген төсбелгімен, Құрмет грамоталарымен, Алғыс хаттармен және мерекелік сый-сияпаттармен марапаттап отырады. Сонымен қатар, облыстық ардагерлер ұйымының марапатына ұсыныс береді.
Аудан көлемінде жақсы жұмыс жүргізіп отырған ауылдық округ ардагерлер ұйымдарының жұмыстарын атап өтсек, олардың қатарында Жайылма ауылдық ардагерлер ұйымының төрағасы Құрманбеков Еркін, Байқадам ауылдық ардагерлер ұйымының төрағасы Төлмағанбетов Арқабай, Жаңаталап ауылдық ардагерлер ұйымының төрағасы Пернебеков Дүйсенбек, Игілік ауылдық ардагерлер ұйымының төрағасы Нәшірбаев Мұсахмет, Ә.Бүркітбаев ауылдық ардагерлер ұйымының төрағасы Жылқыбаев Мәлікомар, Жаңатас қалалық ардагерлер ұйымының төрағасы Орымбаев Жұмалі бар.
Қазан айының алғашқы күні Халықаралық қарттар күні. Бұл күн – өмірінің әрбір сәтін елі мен жеріне арнап, ұрпағының болашағы үшін тер төккен ардақты қарияларға деген құрметтің белгісі.
Қарттар – елдің шежіресі, ұлттың ұлағаты. Олардың жүріп өткен өмір жолы, елге сіңірген еңбегі – кейінгі ұрпаққа үлгі, өнеге. Ұлт болашағын ойлаған, ел мүддесін биік қойған данагөй қариялар – мемлекеттің рухани тірегі. Еліміздің тыныштығын, ұрпақтың тәрбиесін, салт-дәстүрдің сақталуын қарттарымыз қашан да назардан тыс қалдырған емес.
Мемлекет қарт азаматтарға қолдау көрсету ісіне үлкен мән беріп келеді. Зейнетақыны өсіру, әлеуметтік көмек, медициналық қызмет көрсету және қоғам өміріне белсенді араластыру бағытында түрлі бағдарламалар жүзеге асуда. Бұл–қарттарымыздың құрметке лайық екенін білдіреді.
Серік Аппазов,
Сарысу аудандық
ардагерлер кеңесінің төрағасы
