Ұлы Отан соғысының ардагері, қоғам қайраткері, ауданымыздың дамуына өлшеусіз үлес қосқан Ұзақбай Сыздықбаевтың туғанына 100 толып отыр. Көзі тірісінде Республика дәрежесіндегі қызметкер әрі зейнеткер болған, Ұлы Отан соғысының ардагері, еліне еселі еңбек етіп, ауданымыздың әлеуметтік және экономикалық дамуына сүбелі үлесін қосып әрі басшылық қызмет атқарды. Қазақта «Ер есімі — ел есінде» деген даналық сөз бар. Үлкен абырой мен құрметтің биігінен көрінген Ұзақбай Сыздықбаевтың есімі мәңгі жасай бермек.
Ұлы Отан соғысының ардагері Ұ. Сыздықбаев ауылында қоғам қайраткерінің 100 жылдық мерейтойы кең көлемде аталып өтті.
Ең әуелі ауылдың кіре берісіне салынған жаңа арканың ашылу салтанаты өтті. Шараға аудан әкімінің орынбасары Жанғозы Жаркенов, аудандық мәслихат төрағасы Шаттық Мұсабеков, аудандық ардагерлер кеңесінің төрағасы Серік Аппазов пен кеңес мүшелері, зиялы қауым өкілдері, Байзақ ауданының әкімі бастаған делегация, Мемлекет және қоғам қайраткері Мұхамедқали Шәкенов, Ұ.Сыздықбайұлымен бірге иық тіресе қызмет жасаған замандастары, ұрпақтары және туыстары мен ауыл тұрғындары қатысты.
Аудан әкімінің орынбасары Жанғозы Өмірғалиұлы құттықтау сөз сөйлеп, Ұзақбай Сыздықбаевтың өнегелі өмір жолы мен ерлік істеріне тоқталды. Мұнан соң аудандық мәслихат төрағасы Шаттық Мұсабеков, Байзақ ауданының әкімі Олжас Баққараев, Мемлекет және қоғам қайраткері Мұхамедқали Шәкенов те ізгі тілектерін жолдады. Жаңа арканың лентасын Мұхамедқали Шәкенов пен ауылдық ардагерлер кеңесінің мүшесі Ермекбай ақсақал салтанатты жағдайда қиды.
Иә, мемлекет және қоғам қайраткері Ұзақбай Сыздықбаев бірінші хатшы болған жылдары ауданда көп тірлік істелді. Аудан келбеті бар болғаны 2-3 жылда-ақ адам танымастай өзгерді. Атап айтсақ, аудандық партия комитеті ғимаратына қосымша корпустардың қосылуы, аудан орталығындағы алаңның, 600 орындық бүгінгі әл-Фараби атындағы мәдениет үйі, типтік негізде мектептер, балабақшалардың, орталық стадион, «Қарлығаш» пионер лагері, Саз мектебі, Пионерлер үйі, Политотдел құс фабрикасы, Мырзатай түйетауық фабрикасы республикада алғашқылардын бірі болып ашылды. Бұлардан басқа да үлкен-үлкен ғимараттар соғылып, маңайына тал-дарақтардың егілгенін сол кездегі көзі көргендер мақтанышпен айтады.
Мәдениет үйі демекші оған атты да өзі таңдап, алдына қойылатын ұлы даладан шыққан әлемдік ғұлама Әбу Насыр Әл-Фарабидің мүсінін Ленинградтық мүсіншілерге жасатқан екен. Ұлы Жеңістің 30 жылдығы қарсаңында аудан орталығынан соғылған «Қаралы ана» ескерткішінде де Ұ. Сыздықбаевтың қолтаңбасы қалған. 1977 жылы соғылған үш қабатты аудандық орталық аурухана мен емхана күні бүгінге дейін аудан халқына қызмет етіп келеді.
Салтанатты мерейтойға жиылған көпшілік жаңадан «Ұзақбай Сыздықбаев атындағы саябақтың» ашылуының куәсі болды. Жаңа саябақ жанға сая, кешкі серуенге таптырмас орынға айналары сөзсіз.
Саябақтың ашылуында аудандық мәслихат төрағасы Шаттық Мұсабеков, аудандық ардагерлер кеңесінің төрағасы Серік Аппазов, кеңес мүшесі Бәсие Абдрахманов және Ұзақбай Сыздықбаевтың қызы Шолпан Ұзақбайқызы сөз сөйлеп, жаңа саябақтың ауылдың көркін ашатындығын айтты.
Саябақтың лентасын ардагерлер кеңесінің мүшелері Қалмырза Сейдіғаппарұлы, Шолпан Ұзақбайқызы және Жұмашбек қария салтанатты жағдайда қиды.
Айта кетейік Ұ.Сыздықбаев шаруашылықтармен бірге мәдени-ағарту саласына да басымдық беріп отырды. Ұжымшарларда екі-үш қабатты мектеп, балабақша, клубтар салынды. Аудан орталығындағы мәдениет үй жанынан аға бастамасымен «Шолпан» ән-би ансамблі құрылып, оның атағы алысқа кетті. Осы өнер ұжымының атын да өзі таңдап, олардың әрбір дайындықтарын қадағалап отыратын. Бойындағы ұйымдастырушылық қабілетін, өнерін кәсіп деп емес, қасиет деп қарайтын азамат. Ағамыздың өзі де өнерден құралақан емес еді. Пианинода ойнап, домбыра да тартатын. Осылайша өресі биік тұлға екенін өмірдің өзі көрсетті. Қарапайым еңбек адамдарымен өзін тең дәрежеде ұстайтын адами қасиеті ерекшеленіп тұратын. Оның адал еңбегі ешқашанда ескерусіз қалмады. Сарысу ауданындағы бұрынғы Жаңаарық ауылы мен Саудакент, Сарыкемер ауылдарындағы көшелердің Ұзақбай Сыздықбаевтың есімімен аталуы оған халықтың жасаған құрметі, берген бағасы. Ұзақбай ауылындағы орта мектепте арнайы мұражай ашылып, бір сынып Ұ.Сыздықбаев есімімен аталады. Аталған мектептің оқушыларына арнайы шәкіртақы тағайындалып, саябаққа есімі берілді.
Мерейтой аясында өткізіліп жатқан іс-шара одан әрмен жалғасын тауып, аудандық мәдениет үйінің өнерпаздары әуелете ән шырқап, бишілер мың бұрала биледі. Сонымен қатар, Ұзақбай Сыздықбаевтың ұрпақтары құран бағыштап, жиылған көпшілікке ас берілді.
Сондай-ақ аудан әкімдігінің дене шынықтыру және спорт бөлімінің ұйымдастыруымен Ұзақбай Сыздықбаевтың 100 жылдығына арналған ересектер арасында футболдан дәстүрлі аудандық турнир өтті.
Турнирдің ашылуына қатысқан аудан әкімінің орынбасары Е.Ермағанбетов құттықтау сөз сөйлеп, жас спортшыларға сәттілік тіледі.
Сайысқа қала мен ауылдық округтерден құралған командалар қатысып, бақтарын сынады. Тартысты өткен жарыстың қорытындысы бойынша жеңімпаздар мен жүлдегерлер ұйымдастырушылар тарапынан диплом, кубок және медальдармен және қаржылай сыйлықтармен марапатталды.
Сәулет Есқара,
«Sarysý»
