Ел-жұртқа сүйкімді жан-Сарысу ауданының Құрметті азаматы, Тыл ардагері, асыл жан Алтын Досжанова 87 жасқа қараған шағында өмірден өтті.
Бақилық болған Алтын тәтенің бірегей болмысы, рухты келбеті, мейірімді түр-тұлғасы ел-жұрттың жадында. Жұртшылықтың есінде де сол өршіл, намысқой сонымен бірге мейлінше қарапайым бейнесімен, риясыз болмысымен қалды. Айтулы, өзіндік орны бар, салмағы бар тұлғалар өмірден өткенде артында қалғандардың жетімсіреп қалатыны да бар. Алтын тәтенің ақылымен қамқорлығын, ғибратты сөздерін естіген інісі ретінде уақыт өткен сайын ол кісімен болған кездесулерді еске аламын. Кеудемде нәрі қалған сол кездесулер мен үшін мәнін жоғалтпайтын мағыналы сәттер еді.
Алтын тәтеміздің артында жақсы сөз, жақсы істер қалды. Осындай бірегей тұлға жайлы қөзкөргендердің бүгінде айтары, әрине, аз емес. Ол кісі туралы замандастары, кейінгі толқын әр қырынан әңгімелеп, әлеуметтік желіде жазып та жатыр. Адам адамгершілігімен, өзгешелігімен, жан сарайының жарқырауымен есте қалады.
Алтын тәте өте бауырмал, сезімтал, жан-жақты көп білетін, әділ «от ауызды, орақ тілді» кісі еді.
Негізі, әркімнің шамасы әр түрлі ғой. Біреу тарихқа, енді біреуі саясатқа бейім. Ал ол кісі солардың барлығын түгел қамтуға тырысқан, қай-қайсысына да жүйрік болатын. Жастарға жол көрсетіп, түсіндіріп, үлкендігін жасап жүрді. Үнемі елдің жоғын жоқтап, жайын ойлап жүретін.
Ел үшін еткен еңбек те елеусіз қалған емес. Алтын тәте «Ерен ерлігі үшін» медалымен марапатталса, кеудесіне «Халықтар достығы» орденін тақты. «Совет саудасының үздігі» атанып, «Тыл еңбеккері’, «Сарысу ауданының Құрметті азаматы» атанды. Бұл әрине, ғибратты ғұмыр иесіне берілген лайықты баға екендігі даусыз.
Сауда саласындағы үздік еңбегін бағалайтын ел, тағылымды тәрбиесін көрген, тәлімін алған ізбасар шәкірттері көп, солар әрдайым Алтын тәтені мақтанышпен еске алады. Бұл-ол кісіге деген халықтың ықыласы, құрметі.
Тік мінез, турашылдық қасиет, ұлағаттылық ұстаным, кісіге тән парасат пайым оны аудан халқына кеңінен танытып, еңбек жолын көпке үлгі етерліктей дәрежеге көтерді. Елінің кәдесіне жарайтын іс тындырған адамның өмірі әруақытта ұзақ сақталады. Елдің құрметіне бөленген адамына берілетін шын баға-осы.
«Кімде-кім өз ұлтын сүйсе, қияметте де Алла Тағала оны сол ұлттың сапында тірілтеді» дейді қасиетті Хадисте. Өз еліне, халқына қызмет еткеннің әманда жүзі жарық, жұлдызы жоғары.
Алтын тәтенің де жұлдызы жоғары. Ол кісінің асыл, ақжарқын бейнесі ұрпағының, ағайын-туысының, халқының жүрегінде мәңгі сақталады.
Мұрат Сармолдаев,
Саудакент ауылы.
