Отан қорғаушы! Қандай қасиетті де құдіретті сөз.
Әскер қатарында қызмет етіп, Отан алдындағы парызын өтеуге әрбір азамат міндетті. Себебі, туған жерді, елді, атамекенді қорғау-қасиетті борыш. Бұл дегеніміз-батырлық пен табандылық, отансүйгіштік пен Отанға шексіз қызмет етудің нышаны.
Қай дәуірде болсын, Отан қорғау әрбір Қазақстан азаматының қасиетті борышы болып келген. Өзін ер азаматпын деп санайтын кеудесінде ар-намысы, бойында жігері, жүрегінде оты бар әрбір жан үшін ең басты парыз, ең басты адами міндет-осы.
Осыған орай аудан әкімдігінің мәжіліс залында аудан әкімінің орынбасары Е.Ермағанбетов Отан алдындағы әскери міндетін өтеп келген азаматтармен кездесті.
Кездесу барысында аудан әкімінің орынбасары Е. Ермағанбетов:
-Бүгінгі күннің кейіпкерлері-еліміздің тыныштығы мен қауіпсіздігін қорғауда ерлік пен тәртіптің үлгісін көрсеткен, әскери борышын адал өтеп, бүгінде білім мен ғылым жолында талпынған жастар. Бұл-олардың азаматтық жауапкершілігі мен елге деген сүйіспеншілігінің айқын көрінісі.
2024 жылы көктем мезгілінде Сарысу ауданымыздан 85-ке жуық жас сарбаз Отан алдындағы борышын өтеу үшін әскер қатарына аттанып, еліміздің әр өңірінде әскери қызметін абыроймен өткерді. Бұл-елге деген сүйіспеншілік пен азаматтық жауапкершіліктің айқын көрінісі.
Атап айтқанда, олардың арасынан ерекше тәртібімен, үлгілі мінез-құлқымен, әскери дағдыны тез меңгеруімен көзге түскен 3 азамат Отан алдындағы міндетін зор абыроймен атқарып қайтты. Бұл-тек олардың ғана емес, бүкіл ауданымыздың мәртебесі, мақтанышы.
Ең қуаныштысы-аталған үш жас сарбаз елге оралған соң тек әскери тәрбие мен тәртіппен ғана емес, білім жолындағы табандылығымен де дараланып, мемлекеттік білім грантына ие болды. Бұл-олардың еңбекқорлығының, өмірлік ұстанымының және мақсаткерлігінің жемісі. Әскер-нағыз ер азаматтар мектебі. Ол жас ұрпақты тәртіпке, табандылыққа, батылдық пен отансүйгіштікке тәрбиелейді. Біз жастардың ел алдындағы парызын адал атқарып, содан кейін білім мен ғылымға бет бұруын жоғары бағалаймыз. Мұндай қадам-жас ұрпақтың саналы таңдау жасағанының айғағы, — деп Отан алдындағы борышын абыроймен атқарып, елге оралған соң мемлекеттік білім грантын жеңіп алып, үлкен өмірге сенімді қадам басып келе жатқан үш азаматымыз-Нұркелді Жарылқасынов, Қалдар Нұрмұхасан, Асыланбек Ахаевті аудан әкімінің Алғыс хатымен және ата-аналарын бағалы сыйлықтармен марапаттады.
Одан кейін аудандық алқабилер кеңесінің төрағасы Қалмырза Жандарбек және қалалық ардагерлер кеңесінің төрағасы Жұмәлі Орымбаев елімізді қорғау-әрбір азаматтың қасиетті борышы және конституциялық міндеті болып табылатынын жеткізіп, Отан алдындағы міндетін өтеп келген азаматтарды еліміздің гүлденуіне үлес қосуға шақырды.
Жиын барысында Отан алдындағы парызын өтеп, мемлекеттік грант иегері атанған азаматтар сөз алып, құрмет көрсетіп жатқан аудан басшылығына алғыс білдірді.
Осындай кездесулер-өскелең ұрпақтың бойына патриоттық сезімді дарытып, азаматтық жауапкершілікті арттыратын маңызды шара. Бұл-тәрбие мен тағылымның, тәжірибе мен үлгінің нақты көрінісі.
Әскери борышын абыроймен өтеп, елге оралғаннан кейін білім жолында да биік белеске жеткен бүгінгі жастарымыз-барша Сарысу жастарына үлгі.
Сәулет Есқараев,
«Sarysý»
