Әр жыл сайын елімізде медицина қызметкерлерінің күні аталып өтіледі. Бұл-адам жанының арашасы болып жүрген дәрігерлер мен медбикелерге, жалпы ақ халатты абзал жандарға деген елдің ерекше ілтипатын білдіретін айрықша күн. Медицина қызметкерлері күніне орай аудандық мәдениет үйінде салтанатты іс-шара өтті. Мәдениет үйінің кіре-берісіне «Мейірімді жүрек-дәрігердің қолында» атты көрме ұйымдастырылды. Кешке қатысушыларды кітап көрмесімен аудандық кітапхананың кітапханашылары таныстырып өтті.
Мерекелік жиынға арнайы қатысқан аудан әкімі Сәкен Мамытов денсаулық сақтау саласының мамандарын кәсіби мерекелерімен құттықтап, олардың жоғары жетістіктерін атап өтті.
-Сіздерді бүгінгі Медицина қызметкерлері күні кәсіби мерекесімен шын жүректен құттықтаймын. Адамның жанына араша болып, ем іздегенді емдеп жазуға аянбай қызмет еткен медицина мамандарының жұмысы қашан да маңызды. Әркез жанымыздан табылып, ауыр дертті жазуда бел жазбайтын ақ халатты абзал жандардың еңбегі әрдайым ерен. Жаныңа араша түсіп, өміріңді құтқаруды міндет етіп алған дәрігерлерге құрмет әрдайым жоғары болмақ. Олардың әрбір ісін ерлік деп қарау керек. Мемлекет басшысы Қасым-Жомарт Тоқаев: -Халқымыз: «Бірінші байлық-денсаулық»-деп бекер айтпаған. Шын мәнінде, ұлт саулығы-еліміз үшін аса маңызды құндылық. Әлемнің «екінші ұстазы»-Әл-Фараби медицинаны өнер деп бағалаған. Расында, дәрігер болу-жүректің ісі. Бұл-екінің бірі аяқ баса бермейтін жүгі ауыр, күрделі жұмыс. Медицина қызметкерлері-ұлт саулығының сақшылары, ең қадірлі мамандық иелері,-деп медицина саласының мамандарына жоғары баға берген.
Бүгінгі таңда, аудандық орталық аурухананың дәрігерлері халық үшін табанды қызмет етуде. Аудан бойынша барлығы 26 медициналық ұйым бар. Медицина саласында 77 дәрігер, олардың ішінде 9 жас дәрігер, 4 зейнеткер дәрігер жұмыс жасауда және орта буынды 347 медициналық қызметкер бар. Олардың ішінде денсаулық сақтау үздіктері-2, қосымша тартылған дәрігерлер саны-10. Медицина саласында ауданымызда жағымды жаңалықтар мол. Аудандық орталық аурухананың бөлімшелері орналасқан екі ғимаратқа жедел сатылар (лифт) орнатылды, қазіргі таңда толық іске қосылып, жұмыс жасауда. Мекемеге сұранысқа сәйкес, ағымдағы жылға жаңа 5 автокөлік 4-Lada NIVA 1-Lada GRANTA алынды. Аудандық орталық ауруханасынан тұрғындардың, балалардың денсаулығын жақсарту мақсатында, жаңа реабиллитациялық бөлімше ашылды. Тыныс алу жүйесі ауруларын емдеуге, алдын алуға, тазартуға тұз шақтасы (галотерапия) ашылды, әр түрлі тірек-қимыл жүйесі ауруларын емдейтін құрал — жабдықтар мен толық жабдықталған. Құрылғылармен жабдықталу пайыздық көрсеткіш 98% құрайды. Сонымен қатар, шалғайда орналасқан Жайлаукөл ауылында 30 келушіге арналған дәрігерлік амбулаториясы ғимараты соғылып, биыл пайдалануға берілді.
2024 жыл басынан сұранысқа сәйкес, орталық ауруханасына КТ (компьютерная томография) құрылғысы берілді. 2025 жыл басынан КТ құрылғысы орнатылып, іске қосылды. Жалпы соммасы 337,000,00 тг. тұрады. Бұл мемлекет тарапынан көрсетіліп жатқан үлкен қолдау деп білемін. Әр науқастың жанына желеу болып, ауруға қарсы тұрып, саулығын қалыптастырып қана қоймай, адам бойына өмірлік күш-қуат беріп, қоғамның басты байлығы саналатын адам өмірінің сақшысы бола білген ақ халатты абзал жандардың ерен еңбегі, атқаратын істері мол.Асқан қажыр мен табандылықты талап ететін саладағы еңбектеріңіз жана берсін, деп бір қатар сала ардагерлерімен, мамандарына Қазақстан Республикасы денсаулық сақтау министрлігінің «Еңбек ардагері» төсбелгісін және Құрмет және Жамбыл облысы әкімінің Құрмет грамоталары, Жамбыл облыстық денсаулық сақтау басқарма басшысының Алғыс хатын, «Ауданға сіңірген еңбегі үшін» төсбелгісімен және аудан әкімінің Құрмет грамотасы және Алғыс хаттарымен марапаттады. Одан кейін аудандық мәслихаттың төрағасы Ш. Мұсабеков құттықтау сөз сөйледі.
—Сіздерге зор денсаулық, отбасыларыңызға амандық, баянды бақыт тілеймін. Қоғамның сый — құрметіне бөленіп, ел игілігі жолында жаңа табыстарға жете беріңіздер,-деп ақ халатты абзал жандарға аудандық мәслихаттың Құрмет грамотасы мен Алғыс хаттарды тапсырды.
Салтанатты шара барысында «Amanat» партиясы аудандық филиалының консультанты С. Тоқбанов абыройлы қызмет етіп келе жатқан ақ халаттыларды «Amanat» партиясының атқарушы хатшысы Дәулет Кәрібектің «Алғыс» хатын, «Amanat» партиясы аудандық филиалының Құрмет грамотасы және Алғыс хаттарын тапсырды.
Мерекелік шарада аудандық орталық ауруханасының бас дәрігері, «Денсаулық сақтау ісінің үздігі» төсбелгі иегері А.Каликова сөз сөйледі.
-Құрметті ақ халатты абзал жандар мен саналы ғұмырын медицина саласына арнаған ардақты ардагерлер. Медицина қызметкері болу мәртебелі әрі жауапты мамандық екені баршаңызға белгілі. Бұл мамандық иесі-халықпен біте қайнасып қызмет жасайтын, қастерлі еңбек иесі. Жанға дауа, дертке шипа, денге саулық сыйлайтын сол ардақты мамандық иелерін кәсіби мерекелерімен шын жүректен құттықтаймын. Алдағы уақытта да халықтың ризашылығына бөленіп, ел өмірінің жақсаруына өз үлестеріңізді қоса берулеріңізге тілектеспін,-деп бір қатар дәрігерлерге Жамбыл облысы мейіргер ісі мамандарының кәсіби-Қоғамдық бірлестігінің төрайымы-Сарыбекова Жамила Нұрғалиқызының «Шапағат» төсбелгісі, Алғыс хатын, аудандық орталық аурухананың Алғыс хатымен марапаттады.
Ел сыйлаған ардақты азаматтарымыз құрметіне концерттік бағдарлама ұйымдастырылып, дәстүрлі әнші, керемет дауыс иесі Наркенже Серікбаева сахна төріне шығып, ән қоржынындағы әуезді әндерінен шашу шашып, көрермендерге рухани азық сыйлады. Сондай-ақ көпшілік аудан өнерпаздарының өнерін тамашалады. Өнерпаздардың орындауындағы әндер мен нәзік би өрнектері көрерменге мерекелік көңіл-күй сыйлады. Көпшіліктің ыстық ықыласына бөленген концерт медицина қызметкерлерінің көңілін бір серпілтіп, мерекелік кештің сәнін келтірді.
Сәулет Есқараев,
«Sarysý»
