Бүгінде Үкімет тарапынан білім ордаларына жан — жақты көмек көрсетілуде. Бұл сапалы білім алуға деген қажеттілікті толық қамтамасыз ететіні сөзсіз.
Мемлекет басшысы Қасым-Жомарт Тоқаев «Білім келешегі: адал азамат, кәсіби маман» тақырыбындағы тамыз конференциясының пленарлық отырысында сөйлеген сөзінде: «Қазір – білім мен ғылымның заманы. Жаһандану дәуірінде озық білімді игерген, жаңа технологияны меңгерген елдің ұпайы түгел болады. Бүгін саналы ұрпақ тәрбиелей алсақ, ертең заман көшінің басында жүреміз. Сондықтан осы саланы қолдау мемлекеттік саясаттың негізгі басымдығы болып қала береді», — деген болатын. Осыған орай Жаңатас қаласындағы Мұхтар Әуезов атындағы мектеп-гимназиясында заманауи жабдықтармен қамтамасыз етілген стоматологиялық кабинет ашылды.
Салтанатты шарада аудан әкімінің орынбасары Н.Молдабеков, қалалық алқабилер кеңесінің төрағасы С.Бегеев, аудандық қоғамдық кеңесінің төрағасы С.Қырғызбаевтар ізгі тілегін жолдап, жаңа кабинеттің жұмысына сәттілік тіледі.
Айта кетейік, бұл игі жоба Қазақстан Республикасы Денсаулық сақтау министрінің 2024 жылғы 27 қыркүйектегі №680 бұйрығына сәйкес, мектеп жасындағы балалар арасында стоматологиялық аурулардың алдын алу шараларын күшейту мақсатында, 1000 және одан жоғары оқушысы бар ұйымдар үшін, 2024-2028 жылдарға «Болашаққа сау тіспен» бағдарламасы аясында жүзеге асырылып отыр.
Аталған кабинетте профилактикалық жұмыстар жүргізіліп, алғашқы стоматологиялық көмек көрсетіледі. Жобаның басты мақсаты – оқушылар арасында ауыз қуысының гигиеналық мәдениетін қалыптастыру, стоматологиялық аурулардың деңгейін төмендету және балалардың медициналық қызметтерге қолжетімділігін арттыру.
Мектеп ішінде стоматологиялық кабинеттің болуы – оқушылардың денсаулығын тұрақты бақылауға, профилактикалық тексерулер өткізуге, түсіндіру-оқыту шараларын ұйымдастыруға үлкен мүмкіндік береді. Бұл – өсіп келе жатқан ұрпақтың денсаулығын нығайтуға жасалған маңызды қадам.
Стоматологиялық кабинет заманауи құрылғылармен жабдықталған. Мұнда 1 дәрігер-стоматолог және 1 медбике қызмет көрсететін болады.
Бұл кабинет бүлдіршіндеріміздің денсаулығын сақтауға, болашағына жарқын жол ашуға қызмет етеді деп сенеміз.
С. РЫСБЕКҰЛЫ, «Sarysý»
