Еңбек күнi — бұл адамдарды жаңа еңбек шыңдарын бағындыруға ынталандыруға, қолдауға және шабыттандыруға арналған мереке. Мұндай мереке әр елде аталып өтедi. Қазақстанда Еңбек күнi қыркүйектiң соңғы жексенбiсiнде аталып өтедi. Елiмiз азаматтардың еңбекқорлығының арқасында құрылып, дамып келедi. Мемлекет тарапынан жұмысшы мамандықтары иелеріне әрдайым жан-жақты қолдау көрсетіліп келеді. Өндірістегі еңбек жағдайы жақсартылып, ондағы үдерістер автоматтандырылуда. Техникалық білім беру жүйесі реформаланып, кәсіби стандарттар жаңартылуда. Ғылым мен өндіріс арасындағы байланыс нығайып келеді.
Мемлекет басшысы Қасым-Жомарт Тоқаевтың жариялаған «Жұмысшы мамандығы» жылына орай және Еңбек күні мерекесі аясында аудандық Мансап орталығының қызметкерлері аудан тұрғыны, көпбалалы ана және жеке кәсіпкер Айнұр Исентаеваның шеберханасына арнайы барып, мерекемен құттықтап, адал еңбегі үшін мекеменің атынан Алғыс хат тапсырды.
Айта кетейік жеке кәсіпкер Айнұр Изатуллақызы 30 жыл еңбегін тігін саласына арнап, ауданға еңбегі сінген жан. «Адал еңбек — ардың ісі» дегендей, ауданымызда осындай еселі еңбегімен елге елеулі болған жандардың жұмыстары жемісті бола бергей.
С.Есқара,
«Sarysý»
