1 қыркүйек күні, ауданымыздың барлық білім беру ұйымдарында жаңа оқу жылының басталуына арналған салтанатты шаралар өтті. Мектептерде мерекелік жиындар, сынып сағаттары мен арнайы іс-шаралар ұйымдастырылды.
Аудан әкімі Сәкен Мамытов ауданымыздың қара шаңырағы Саудакент ауылындағы Б.Қашқынбаев атындағы орта мектебінде болып, ұстаздар мен ата-аналарды, оқушыларды Білім күні мерекесімен құттықтады.
— Білім-адам баласының өмірлік серігі, өз тағдырының тұғыры болса, білімді, тәрбиелі ұрпақтың бастауы-білім ошақтары. Еліміздің өсіп-өркендеуі-ұлттық білім жүйесінің деңгейіне, даму бағытына, мектеп біліміне тікелей байланысты. Сондықтан да, білім беру жүйесін дамыту мемлекеттік саясаттың басым бағыттарының бірі,-деп ұстаздар мен оқушыларға жаңа жетістіктер мен ізденістер, шығармашылық табыстар тіледі.
Иә, ауданымыздағы іргелі білім ошақтарының бірі-Байқадам Қашқынбаев атындағы орта мектебіне «Ауыл-Ел бесігі» жобасы шеңберінде ауылдық елді мекендердегі әлеуметтік және инженерлік инфрақұрылым бойынша іс-шараларды іске асыру бюджеттік бағдарламасымен күрделі жөндеу жұмыстары жасалып, жаңа оқу жылында пайдаланылуға беріліп отыр. 520 орындық мектепте 318 оқушы білім алады. Мұнда шахмат, волейбол, тоғызқұмалақ, асық ату, футбол, баскетбол, «Айбын» әскери патриоттық және бокс үйірмелері жұмыс жасайды.
Салтанатты шара оқушылардың мерекелік сазды бағдарламасымен жалғасты.
Іс-шарада оқушылардың ойлап тапқан робототехникалары және күннен қуат алатын жылы жайдың макеті, бұйымдар көрмеге қойылды.
Сондай-ақ аудан басшысы аталмыш мектепті аралап, жай-күйімен танысты.
Аудан мектептерінде өткен салтанатты шараларға аудан әкімінің орынбасарлары, аудандағы мекеме және кәсіпорындардың басшылары қатысып, оқушыларды мерекелерімен құттықтады. Аудан әкімінің құттықтауын жеткізді.
Камели Сүлейменова,
«Sarysý»
