Ауыл шаруашылығы – еліміздің экономикалық тұрақтылығы мен азық-түлік қауіпсіздігінің негізгі тірегі. Мемлекетіміздің аграрлық секторы жылдан-жылға дамып, жаңа технологиялармен жабдықталуда. Дегенмен бұл саланың даму бағытын нақты жоспарлау үшін шынайы әрі толық мәліметтер қажет. Осы мақсатта елімізде ауыл шаруашылығы санағы жүргізілуде.
Ауыл шаруашылығы санағы – бұл тек статистикалық шара емес, бұл – ауыл экономикасының бүгінгі жай-күйін зерделеп, ертеңгі күнге нақты жоспар құрудың негізі. Санау арқылы біз егістік жерлердің көлемін, мал басының санын, ауыл шаруашылығы техникасы мен еңбек ресурстарының ахуалын толық біле аламыз. Мұндай мәліметтер алдағы аграрлық саясатты тиімді құруға септігін тигізеді.
Ауданымызда бұл маңызды шараға дайындық қызу жүріп жатыр. Арнайы оқытылған санақшылар ауылдарды аралап, қажетті мәліметтерді жинақтауда. Санақ барысында әр шаруа қожалығы мен жеке қосалқы шаруашылықтар назардан тыс қалмайды.
Бүгінгі күні цифрландыру заманы екенін ескере отырып, мәліметтерді жинау процесі заманауи технологиялар көмегімен жүзеге асырылуда. Бұл өз кезегінде ақпараттың дұрыстығы мен өңделу жылдамдығын қамтамасыз етеді.
Осы ретте аудан тұрғындарына, әсіресе ауыл еңбеккерлеріне айтарымыз: санақшылардың жұмысына түсіністікпен қарап, толық және шынайы ақпарат беруге белсенді атсалысуларыңызды сұраймыз. Сіздің берген әрбір ақпаратыңыз – ауданымыздың агроөнеркәсіптік әлеуетін дамыту жолындағы маңызды қадам екенін ұмытпаған жөн.
Ауыл шаруашылығы санағы – барды бағалау, кем-кетікті түгендеу, болашаққа бағыт алу. Осыны ескере отырып, баршаңызды ортақ іске жауапкершілікпен қарауға шақырамыз.
Н. Молдабеков,
аудан әкімінің орынбасары
