Аудан әкімі Сәкен Мамытовтың халықпен дәстүрлі есептік кездесуі Байқадам ауылдық округінде жалғасты. Жиын барысында аудан басшысы ауылдың қазіргі жағдайын саралап, келешекте жүзеге асырылатын жұмыстар жайында баяндама жасады.
Аудан әкімінің айтуынша, Саудакент ауылдық округінде әлеуметтік-экономикалық дамудың оң динамикасы қалыптасқан. Бірқатар инфрақұрылымдық және қоғамдық маңызы бар жобалар іске асырылып жатыр.
Атап айтқанда, ауылдағы өрт сөндіру ғимаратына ағымдағы жөндеу жұмыстары жүргізілуде. Нысанның шатыры толықтай жаңартылып, өрт сөндіру көліктеріне арналған бокс салынып, ғимараттың ішкі және сыртқы бөліктері жөнделіп жатыр. Бұл — ауыл қауіпсіздігі үшін аса маңызды қадамдардың бірі.
Сонымен қатар, Сұлтанғазиев көшесіне ақпараттық-танымдық материалдар мен жарнама орналастыруға арналған заманауи LED экран орнатылды. Бұл құрылғы жергілікті халықты жедел ақпараттандыру мен қоғамдық хабарламаларды таратуда маңызды рөл атқарады.
Су тасқынының алдын алу және ауыл көшелерінің санитарлық тазалығын жақсарту мақсатында Сұлтанғазиев көшесіндегі мектепке дейінгі 172 метр ұзындықтағы су ағатын лоток жаңартылды. Бұл жоба көктемгі су тасқыны кезінде судың кедергісіз ағуын қамтамасыз етіп, жасыл желектер мен ағаштарды тұрақты суаруға мүмкіндік береді.
Ауылдағы тағы бір маңызды жоба — Тұрар Рысқұлов көшесінде волейбол және баскетбол алаңшасының салынуы. Жаңа спорттық нысан ауыл тұрғындарының, әсіресе жастардың бұқаралық спортпен айналысуына жағдай жасап отыр.
Саудакент ауылының батыс бөлігінде, Сармолдаев көшесінде, ауыл шаруашылығы саласына қажетті жаңа нысандардың құрылысы жүргізілуде. Атап айтқанда, ветеринарлық пункт, мал емдеуге арналған орын және тоғытпа бой көтеріп жатыр. Бұл кешен ауылдағы мал шаруашылығының дамуына септігін тигізбек.
Кездесу барысында аудандық ардагерлер кеңесінің төрағасы Серік Аппазов ауданның қоғамдық өміріне белсене араласып жүрген бірқатар ардагерлерді марапаттады. Бұл игі дәстүр ұрпақтар сабақтастығын нығайтып, ардагерлердің еңбегін елеп-ескерудің жарқын көрінісі болды.
Саудакент ауылындағы жүйелі жұмыстар – аудан әкімдігі тарапынан жасалып жатқан нақты қолдаудың нәтижесі. Ауылдағы оң өзгерістер – халықтың өмір сүру сапасын арттырып, елді мекеннің көркіне көрік қосары сөзсіз.
Байыпты басқосу ел мен жерге шынайы жанашырлықпен қараудың мән-маңызын тағы бір мәрте аңғартты. Алдағы уақытта да мұндай кездесулер ауыл өмірінің көкейкесті мәселелерін шешуге бағытталып, халық пен билік арасындағы байланысты нығайта бермек.
