Мектеп – бастапқы білім тірегі, оның сапасы тек өскелең ұрпақтың тағдырына ғана емес, ел тағдырына да түбегейлі қатысты. Ұстаздардың айтуынша, бүгінгі білім саласы заманауи үлгілерге сай болуы керек. Яғни мектептер мен балабақшаларда инновациялық технологиялар мен ғылыми үрдістердің жаппай қолданылуы– өмір талабы. Осындай жаңа әдістемелер мен нақты бағдарламалардың маңыздылығы, мәнділігі ұстаздардың дәстүрлі тамыз кеңесінде талқыланды, айқындалды.
Аудандық мәдениет үйінде «Білімнің келешегі: адал азамат, кәсіби маман» тақырыбында дәстүрлі тамыз конференциясының секциялық отырыстары өткізілді.
Тамыз кеңеске келген ұстаздар мен жиынға қатысушылар ауданымыздағы өнер, балабақша, техникалық шығармашылық орталығының ұстаздары мен оқушылары жасаған қолөнер бұйымдарымен танысты.
Бүгінгі ұстаздардың аудандық тамыз конференциясына білім беру ұйымдарының басшылары, ұстаздар, білім саласының ардагерлері, облыстық мәслихат депутаты, аудандық мәслихат төрағасы және құқық қорғау органдары мен мекеме басшылары қатысты.
Ең әуелі Мемлекет басшысы Қасым-Жомарт Кемелұлы Тоқаевтың білім саласы қызметкерлеріне арналған арнайы бейне құттықтауын тыңдады. Сондай-ақ жиынға қатысушылар «Білім беру жүйесіндегі жетістіктер мен стратегиялық басымдықтар туралы» бейнебаянды көріп, білім саласындағы тың серпілістер мен нақты жетістіктердің куәсі болып, бейнебаян арқылы білім саласындағы тың жетістіктер мен жаңа стратегиялық бастамалардың, жүзеге асып жатқан ауқымды өзгерістер мен алдағы мақсаттар туралы мол мағлұмат алды.
Жиында аудандық білім бөлімінің басшысы Ж.Жарықбасов «Сарысу ауданы білім жүйесі: даму келешегі мен негізгі міндеттері туралы» баяндама жасады.
-Ұлы Абай Құнанбайұлы: «Адам баласы адам баласынан ақыл, ғылым, ар, мінез деген қасиеттерімен озады»,- деген еді.
Дәл осы асыл қасиеттердің түйінін– адалдық пен кәсібилікті бүгінгі білім қызметкерлері бас қосқан тамыз кеңесінің арқауы етіп отырмыз.
Күні кеше ғана өткен республикалық ұстаздардың тамыз конференциясында Мемлекет басшысы Қасым-Жомарт Кемелұлы Тоқаев: «Бүгін саналы ұрпақ тәрбиелей алсақ, ертең заман көшінің басында жүреміз»,- деп атап өтті.
Бұл сөз – бүгінгі білім саласының бағдаршамы.
Ал, тұлғаны тәрбиелейтін ұстаздың бойындағы адалдық – шәкірттің жүрегіне ұялайды, кәсібилік – болашағына жол ашады.
Ендеше, ұстазға жүктелетін міндет– тек білім үйрету ғана емес, ұлттың рухын асқақтату, жүрегіне мейірім мен адалдықтың дәнін егу.
Үкімет пен облыс, аудан әкімдігінің айрықша қолдауының арқасында білім беру ұйымдарының материалдық-техникалық базасы жаңартылып, оқыту сапасын арттыруға барлық жағдайлар жасалуда.
Осы орайда, оқыту сапасын арттырудағы ең бірінші өзекті мәселе — оқушылардың цифрлық сауаттылығын арттыру, білім беру жүйесінде жасанды интеллекттің мүмкіндіктерін тиімді пайдалану.
Бұл туралы Президентіміз: «Балаларға жастайынан жасанды интеллект технологиясын оқытқан жөн. Бұл – болашақта жастарымыздың бәсекеге қабілетті озық маман болуына қажетті бірден-бір дағды» — деп, барлығымызға үлкен міндеттерді жүктеді.
Сондай-ақ, цифрлық білім берудегі аудандағы оң динамиканы атап өтсем:
Аудандағы білім беру ұйымдары түрлі цифрлық платформаларды, жасанды интеллект құралдарын пайдаланады.
Жас мамандар арасында жаңа технологияларға қызығушылық жоғары,-деп білім саласында атқарылған және алдағы атқарылатын жұмыстар мен жетістіктерге тоқталды.
Конференцияда Д. Қонаев атындағы орта мектебінің директоры Л. Шукеева
«Кәсіптік бағдар беру — болашақ кепілі» тақырыбында хабарлама жасады. Одан кейін осы мектептің мұғалімі Б.Тулеуова цифрлық дәуірдің, жасанды интеллекттің мүмкіндіктерімен таныстырды.
Жыл сайын жаңа оқу жылы қарсаңында өткізілетін тамыз кеңесі – алдағы жоспарларды бағдарлап, міндеттерді айқындайтын маңызды жиын. Басты міндет – жан-жақты жетілген, ақыл-парасаты мол, мәдени, ғылыми өрісі озық, бәсекеге қабілетті болашақ қоғам иелерін тәрбиелеу.
Тамыз кеңесіне қатысқан аудан әкімі С.Мамытов:
-Сіздерді, білім саласы қызметкерлерінің республикалық тамыз кеңесінің басталуымен шын жүректен құттықтаймын!
Жаңа оқу жылы қарсаңында педагог мамандардың басын қосып, өскелең ұрпаққа білім, тәрбие беру мәселесіне қатысты алқалы жиын өткізу игі дәстүрге айналған. Бұл – еліміздің болашағына ықпал ететін маңызды басқосу. Сапалы білім беру бәсекеге қабілетті, өркениетті ел болудың кепілі. Адамзат тарихындағы жетістіктің барлығы ілім, ғылымның жемісі екендігі сөзсіз. Сауатты ұрпақ өсіру арқылы ғана ұлттың жаңа сапасын қалыптастыра аламыз.
Мемлекет басшысы Қасым — Жомарт Тоқаев: «Білім келешегі: адал азамат, кәсіби маман» тақырыбындағы республикалық тамыз конференциясының пленарлық отырысында: — Ұстаз – ұлттың шамшырағы. Сіздер күнделікті қажырлы еңбектеріңіз арқылы ел дамуына өлшеусіз үлес қосып келесіздер. Жас ұрпақтың бойына білім нәрін сеуіп, озық ойлы ұлт тәрбиелеп жүрсіздер. Халқымыздың зияткерлік қуатын арттыруға белсене атсалысып жатсыздар, — деп ұстаз мәртебесінің маңыздылығына тоқталды. Расында бүгінгі таңда, ұстаздарға деген қоғамның құрметі ерекше болуы тиіс.
Бүгінде үкімет білім аламын деген жастарға жан-жақты қолдауларды жүйелі түрде іске асырып келеді. Бұл туралы Президентіміз: — Баланың бәрі бірдей. Ауыл баласы мен қала баласының білім алу мүмкіндігі де бірдей болуы керек. «Келешек мектептері» жобасының негізгі мақсаты да – осы, — деп нақты айтты.
Жаңа оқу жылын 8 900-ға жуық оқушымен бастаймыз деп жоспарлап отырмыз. 1-ші сыныпқа қабылдауға 764 өтініш қабылданып отыр. Жалпы білім беру нысандарында 1 800-ден астам педагог қызмет етуде.
Ағымдағы жылы «Ауыл-Ел бесігі» жобасы аясында Саудакент ауылындағы Байқадам Қашқынбаев және Игілік ауылындағы Шоқай датқа орта мектептері 233 млн. теңгеге күрделі жөндеуден өтті. Тоғызкент ауылындағы «Жанна» балабақшасы мен Шағалалы орта мектебіне 29 млн. теңгеге блок модульді газ жүйесі орнатылды.
Бұдан бөлек, көптен бері көтеріліп келген Жаңатас қаласындағы «Болашақ» бөбекжай-бақшасына 355 млн. теңге қаржы қаралып, ғимарат күрделі жөндеуден өтуде. Аталған жобалардың барлығы балаларымыздың сапалы тәрбие мен білім алуы үшін жасалуда.
Жарқын болашақтың есігін ашатын жас ұрпаққа жол сілтейтін ұлағатты ұстаздарға құрметіміз әрдайым жоғары болмақ. Жаңа оқу жылы сәтті болғай,-деп ұстаздар қауымына еліміздің жас көшбасшыларын тәрбиелеуде темірдей төзім мен қайсарлық тіледі.
Жиын барысында аудан әкімі бірқатар сала қызметкерлері мен ардагерлерге оқу-ағарту министрлігінің Алғыс хатын, облыс, аудан әкімінің Құрмет грамоталары мен Алғыс хаттарын және «Ауданға сіңірген еңбегі үшін» төсбелгісін тапсырды.
Одан кейін аудандық мәслихаттың төрағасы Ш. Мұсабеков сөз алып, білім мен технология тез өзгеріп жатқан уақытта елдің болашағы оқу сапасына тікелей байланысты екенін атап өтті. Сондай-ақ аудандық мәслихаттың Құрмет грамоталары мен Алхыс хаттарын сала қызметкерлеріне тапсырды.
Аудандық білім бөлімінің басшысы Ж. Жарықбасов, ұстаздарға білім бөлімінің Құрмет грамотасы және Алғыс хатын,
2024-2025 оқу жылының білім беру ұйымдарының қызметін бағалау және дамыту, білім саласын арттыруды ынталандыру мақсатында жүргізілген мектептердің рейтингісінің қорытындысы бойынша Мұхтар Әуезов атындағы мектеп-гимназиясының ұжымы «Үздік мектеп-гимназиясы» номинациямен марапатталып, интрактивті панелдің сертификаты берілді.
Б. Адамбаев атындағы тірек орта мектебі «Үздік инновациялық мектеп» номинациясы бойынша танылып, принтердің сертификаты тапсырылды. Ал, «Үздік даму мектебі» номинациясы бойынша Д.Қонаев атындағы мектеп ұжымы марапатталып, принтердің сертификатын берді.
Аудандық мәдениет үйінің өнерпаздары әннен шашу шашты.
Сәулет Есқара,
«Sarysý»
