Сенбілік-тазалық кепілі.
Қоршаған ортаның тазалығына жауапкершілікпен қарау-әрбір азаматтың басты міндеті. Осы міндетті орындау мақсатында Жаңатас қаласында осы аптаның бейсенбісі күні сенбілік өтті.
Қаланың көркі мен дамуы үшін маңызды болып табылатын аталған шараға мекеме, кәсіпорын қызметкерлері қатысты.
Мекеме қызметкерлері бір кісідей атсалысып, әрбір ұжым бөлінген аумақтарға, «Мәңгілік алау» монументінің айналасына тазалық жұмыстарын жүргізді.
Сенбілік нәтижесінде саябақ ішіндегі тал-дарақтар әктеліп, жол жиектері және арық жүйелері қатты қалдықтардан, арам шөптерден тазартылып, арнайы техникалардың көмегімен бірнеше тонна қоқыс шығарылды.
Қай кезде де болмасын ең бірінші өз ортаңа тазалықпен қарау-адамдықтың басты қасиеті екендігі белгілі. Аталмыш шараның аудан тазалығын сақтауда ғана емес, еліміздің экологиялық жағдайын жақсартуда да алар үлесі зор.
Сенбілікті ұйымдастырушылар бұл шара алдағы уақытта да жалғасын табатындығын айтты.
Жаңатас қаласы әкімінің орынбасары Талғат Төлебаев:
-Қала көшелерінің бойын тазалап, айналаны абаттандыру жұмыстарына атсалысты. Қызметкерлер жерде жатқан қоқыстар мен сынған ағаш бұтақтарын жинап, көшені ретке келтірді. Сенбіліктің басты мақсаты-қаланың тазалығын сақтау, жайлы әрі көрікті орта қалыптастыру. Барлық тұрғындарды өзі тұратын үйдің ауласын таза ұстап, рұқсат етілмеген жерлерге қоқыс қалдықтарын тастамай, қала тазалығының сақталуына үлес қосуға шақырамыз,-деді.
Қоршаған ортаны абаттандыруға жанашырлық танытып, өткізілетін сенбіліктің мақсаты-қоршаған ортамызды аздырмай, қолдан келгенше көркейтіп көгалдандыру. Қашан да халық үшін өз тұрған жері-руханияттың темірқазығы, ұлттық құндылықтардың алтын бесігі, береке-байлықтың бастауы. Табиғатынан қуаттанған әрбір азамат өз ауласын таза ұстап, қадірлеуі тиіс.
Жалпықалалық сенбілік-қоғамның табиғатқа деген жауапкершілігін арттырып, бірлік пен тазалыққа бастайтын игі іс.
Сәулет Есқара,
«Sarysý»
