Ұлы Жеңістің 80 жылдығына орай, Жаңаталап ауылында «Желбіре, Жеңістің жалауы» атты өнер фестивалі өтті.
Шараға аудан әкімінің орынбасары Е. Ермағанбетов, аудандық алқа билер кеңесінің төрағасы Қ.Жандарбек, аудандық қоғамдық кеңестің төрағасы С. Қырғызбаев және ауыл тұрғындары қатысты.
Шарада аудан әкімінің орынбасары Ерлан Дайрабайұлы құттықтау сөз сөйлеп, Ұлы Жеңістің 80 жыл толуына орай соғысқа қатысқан жауынгерлер мен тыл еңбеккерлерінің ерлігін ұмытпай, ұрпақ жадында мәңгі сақтау мақсатында осындай ауқымды іс-шаралар ұйымдастырылып жатқанын атап өтті.
Өнер фестивалі барысында ұлттық нақыштағы қолөнер бұйымдары көрмеге қойылып, салт-дәстүрлерімізді дәріптейтін сахналық көріністер қойылды.
Сондай-ақ, ауылдың әншілері әуелете ән шырқаса, бишілер мың бұрала би билеп, фестивальдің көркін кіргізді. Әсіресе, Ыбырайым Сүлейменов атындағы мектеп оқушыларының соғыстың қиын да азапты жылдарын сахналастырған көрінісіне көрермендер қошемет көрсетті. Айта кетейік, барлық ауылдық округті қамтитын өнер фестивалі күз айында Жаңатас қаласында өтетін гала концертпен қорытындыланады.
Сәулет Есқара,
«Sarysý»
