Қаланың таза, әдемі әрі жасыл желекке оранып тұруы әрбір адамның сүйіспеншілігі мен жанашырлығын қажет етеді. Соңғы жылдары шаһардың ауқымы кеңейіп, күн санап қарыштап дамуда. Сондықтан тазалық мәселесі алдыңғы орында.
Ауланы ретке келтіріп, ұқыпты ұстау санитарлық талап қана емес, мәдениет пен талғамның белгісі. Ауданымызда тазалық мәселесі күн тәртібінен түскен емес. Аудан орталығы Жаңатас қаласында күнделікті шашылатын қоқыс мәселесі бар. Оны тазартумен айналысатын ұйым үздіксіз қызмет етуде. Алайда, бір қаланың тазалығын сақтау үшін бір ғана ұйым ішіндегі қызметкерлердің жұмысы жеткіліксіз.
Жарты ғасырдан астам тарихы бар кеншілер қаласы күннен-күнге құлпырып келеді. Республика, облыс, аудан тарапынан қолдаулар көріп, шешуін күткен мәселелер атқарылып келеді. 10 жыл ішінде аудан орталығы түрлене түсті. Апта сайын мекеме, кәсіпорын қызметкерлері балалар ойын алаңшасы, орталық саябақтар ішінде тұрғын үй аулаларын, орталық көшелерде сенбілік жұмыстарын ұйымдастырып келеді. Елімізде экологиялық мәдениетті нығайту мақсатында ұйымдастырылып жатқан «Таза Қазақстан» республикалық акциясы аясында бүгінде қалада көптеген ауқымды жұмыстар атқарылып жатыр.
Алайда мемлекет тарапынан салынған қаладағы көрікті жерлеріміз тазалық мәдениетті сақтамаған, елге жаны ашымаған азаматтардың кесірінен бүлініп қоқысқа айналуда. Көпке топырақ шашпаймыз, дегенмен кейбір тұрғындардың кесірінен қоқыс қалдықтарынан көз ашпаймыз. Бұны айтатын себебіміз де бар. Атап айтар болсақ орталық саябақтар іші, қаладағы шағынаудандардағы қоқыс тастайтын орындардың маңайы, Халық банкінің алды шашылған қоқыс. Ауданымыздың айнасы «Сарысу» газетінің алдындағы су ағарларды кейбір тұрғындар үйден шыққан қалдықтармен толтырып тастайды. Ең сорақысы ас атасы нанымызды аяқ асты етуде. Әкімшілік тарапынан егілген гүлдер мен талдарды қараусыз жүрген жылқы, сиыр, ит, мысықтар құртуда. Талапқа сай салынған балалар, футбол ойын, алаңшаларын, көше бойындағы жарық шамдар мен орындықтарды сындырып, бүлдіріп, тіпті пістенің қабығын, темекінің тұқылдарын бей-берекет шашып кететін өзімізбіз. Сол қоқыстарды орындықтардың әрбірінің қасына арнайы қойылған қоқыс жәшіктеріне тастауға не кедергі?
Бұның барлығын сырттан келіп бүлдірмейді. Әр тұрғын туған жерге, тұрып жатқан өлкесіне жаны ашыса бұндай келеңсіз жағдайлар орын алмас еді.
Қаламыздың көркі мен тазалығы баршамызға байланысты. Тұрғындар қарапайым тазалық мәдениетін сақтап, өз қаламызға жанашырлықпен қарау керек. Қала тазалығы қай кезде болмасын басты мәселелердің бірі болып келеді. Тазалық жөніндегі қызметкерлер де қыс бойы шытынаған аязды күні көше тазалығы үшін аянбай қызмет етеді. Мұндай еңбекті өздеріңіз де көзбен көріп жүрсіздер. Сондай-ақ соңғы жылдары тазалық мәселесіне жоғары басшылықтан аса мән беріліп келеді. Яғни қаланы таза ұстаумен қатар, көгалдандыру, көркейту мәселесіне ерекше ден қойылған болатын.
Бүгінгі технология шарықтап дамыған заманда әр адамның көзі ашық, көкірегі ояу. Қай істің дұрыс, қай істің бұрыс екенін саралай алатындай деңгейі бар. Бірақ сол тұрғындарға тазалықтың өз табалдырығынан басталатынын жеткізу соншалықты қиын болып отыр ма? Жоқ, әрине. Сана тазармай, қала тазармайтыны секілді, әр адам тазалықты өзінен бастар болса, қаламызда тазалық жөнінен мәселе қозғалмас еді.
Кей тұрғындардың аулаға бей-берекет шығарған қоқыстары қала көшелерін ластап жататыны анық. Осы орайда ауданымыздың желді ауа райын ескере отырып, тұрмыстық қатты қалдықтарды ашық түрде тастамауы қажет. Ескере кетсек, ортақ пайдаланылатын орындарды, саябақтарды, оның ішінде белгіленбеген орындарға коммуналдық қалдықтарды тастау бойынша бейнебақылау камералары арқылы Қазақстан Республикасының Әкімшілік құқық бұзушылық туралы Кодексінің 434-2-бабына сәйкес хаттамалар толтырылып, айыппұл салынады.
Көрікті қаламыздың экологиясы-басты мәселе. Ауа ластанбай, тазалық шарасы сақталған жерде ғана қоршаған ортаға зиян келмесі анық. Сол үшін сіз бен біз болып қала тазалығын басты назарда ұстайық! Өскелең ұрпақ бойына тазалық мәселесінің адам өміріндегі маңызы туралы айта жүріп, өз мекеніне зияны тиетін іс жасамауына кепіл болайық.
Сәулет Есқара,
«Sarysý»
