Бала болашағы-бір отбасының ғана емес, қоғамның, халықтың, тұтас бір ұлттың бүгіні мен өткенін жалғастыратын алтын көпір, асыл мұрасы.
Тәрбие-ұрпақты биік мұратқа жетелейтін сапалы білімнің тұғыры. Ұлттық құндылықтармен сусындап өскен ұрпақ ұлағатты болмақ. Дәл осы өскелең ұрпағымыз ұлттың сапасын құрайды. Сондықтан да қадір-қасиет, ар-намыс, адалдық, патриотизм, жауапкершілік, әдептілік, мейірімділік, сүйіспеншілік, үлкенге ізет, кішіге құрмет сияқты қасиеттерге ие азаматты тәрбиелеу маңызды.
Қызылдиқан орта мектебінде «Білімді ұрпақ-жарқын болашақ кепілі» тақырыбында мектепшілік ата-аналар форумы өтті.
Форумға Жайылма ауылдық округ әкімі Ж. Смағұлов, аудандық мәслихат депутаты Қ.Дүзкенов, жергілікті учаскелік полиция инспекторлары Р. Мұсаев, Н. Сембиев, Қызылдиқан ауылдық ардагерлер кеңесінің төрағасы А.Жылқыбаев, ауылдық ата-аналар кеңесінің төрағасы Ж.Смағұлов, «Жастар ресурстық орталығының» мамандары, ата-аналар, мектеп мұғалімдері қатысты.
Аталмыш форумның мақсаты-оқушылардың сапалы білім алуы мен тәрбиесінде ата-ана, мектеп, ұстаз арасындағы ынтымақтастықты нығайту.
Білімді ұрпақ тәрбиелеуде ата-ананың ролін арттыру. Баланың болашағына жауапкершілікпен қарауды үндеу. Бала қауіпсіздігіне көңіл бөлу.
Міндеттері: құқық бұзушылықтың алдын алу, білім алушының тұлғалық дамуына, қауіпсіздігіне жағдай жасау жолдарын бірлесе талқылау, ата-анамен педагог арасындағы серіктестікті дамыту.
Ата-аналар форумында ауылдық округ әкімі Ж. Смағұлов сөз сөйледі.
-Тәрбие ұрпақты мұратқа жетелейтін сапалы білімнің бірі. Ұлттық құндылықтармен сусындап өскен ұрпақ ұлағатты болмақ. Президент тапсырмасымен дайындалған Біртұтас тәрбие бағдарламасы еңбекқор, адал,саналы жасампаз азаматты тәрбиелеуде маңызды. Оған біздер, ата-аналар үлкен үлес қосу керекпіз. Дәл осылайша өскелең ұрпақ ұлт сапасын құрайтын болады,-деді.
Одан кейін Қызылдиқан орта мектебінің директоры А. Әбілдаев сөз сөйледі.
— Өскелең жас ұрпақты рухани-адамгершілік қасиетке баулу, тәрбиелеу-барлық кезеңде өзекті. Біздің келешегіміз-жасұрпақ, ал ұрпақ тәрбиесі адамзаттың мәңгілік тақырыбы.
Ел ертеңі болар бүгінгі балалар мен жасөспірімдерді тәрбиелеу, әлеуметтік тұрғыдан барынша қамтамасыз ету, толыққанды білім алуына жағдай жасау, олардың құқықтары мен заңды мүдделерін қорғау Қазақ елінің ұлттық саясатының басты бағыттарының бірі.
Тәрбие мен оқыту өзара тығыз байланысты, бір бірінен бөліп алуға болмайтын біртұтас процесс. Білім беру ұйымдарындағы тәрбие пән мазмұны, сынып сағаттарының және мектептен, сыныптан тыс қосымша білімберу мазмұны арқылы жүзеге асады,-деп ұлттық құндылықтарды негізге ала отырып, ел бірегейлігін нығайтуға, әділетті қоғам құруға білімді, адал ұрпақты тәрбиелеуді көздейтініне тоқталды.
Сондай-ақ жергілікті учаскелік полиция инспекторлары Р.Мұсаев «Құқықбұзушылықтың алдын алу» тақырыбында хабарлама жасады.
Форумның форматы да өзгеше болды. Өнерлі оқушылар өз өнерлерін көрсетсе, ата-аналар сурет салып, психологтар тренингтер өткізді. Форумда көрме ұйымдастырылып, ата-аналар бір-бірімен жақынырақ танысуға мүмкіндік туды.
Кездесу кезінде ата-аналар жиналыс шартымен және мақсатымен танысып, «Баланың бас ұстазы-ата-анасы», «Отбасы портретін бейнелеу», «Отбасы-бақыт мекені» т.б тапсырмалар мен ойындарына қатысып, белсенділік көрсетті.
Жалпы, форум қоғамдағы ата-ана беделін нығайта отырып, отбасы беріктігі үшін жасалатын нақты қадамдарды айқындап берді. Сондай-ақ баланы тәрбиелеу мен өмір жолында қалыптастыра білу туралы негізгі өзекті мәселелерге қатысты сындарлы диалог болды. Оларды оңтайлы шешу және осы бағытта бірлесіп әрекет ету жолдары анықталды.
Сәулет Есқара,
«Sarysý»
