Бүгінгі таңда жастар саясатын тиімді жүзеге асыру-қоғамның дамуына қосылған сүбелі үлес. Осы орайда аудандық «Жастар ресурстық орталығы» жыл басынан бері бірқатар игі істерге ұйытқы болып келеді. Орталықтың басты мақсаты-жастарды қолдау, шығармашылығын дамыту және оларды қоғамдық өмірге кеңінен тарту.
Ағымдағы жылы орталық ұйымдастырған іс-шаралардың ішінде ерекше атап өтерлік жобалар бар. Солардың бірі-«Махаббат-мәңгі ертегі» атты лирикалық кеші. Қозы-Көрпеш Баян сұлу күніне орай ұйымдастырылған бұл шара жас буынға рухани тәрбие беріп, өнерге деген қызығушылығын арттыруға бағытталған. Сонымен қатар, ұлттық музыка мен поэзияны ұштастыра отырып, жастардың сезім әлемін байытуға жол ашты. Сондай-ақ, «Жұмысшы мамандықтар» жылына орай жастардың кәсіптік шеберлігін арттыру мақсатында ұйымдастырылған «Үздік аспаз-2025» аспаздар байқауы мен «Профи-2025» кәсіби байқаулары олардың еңбекке деген ынтасын оятып, болашақ мамандық таңдауына септігін тигізді. Бұл жобалар арқылы жастар өз қабілеттерін танытып қана қоймай, тәжірибе алмасуға мүмкіндік алды. Музыка сүйер қауымға арналған тағы бір маңызды кештер-Жаңатас қаласында орталық саябақта өткізілген «Ән аға» және Арыстанды ауылында өткізілген «Сен сұлу» атты акустикалық кештері. Бұл кештер жастардың шығармашылық қабілетін шыңдап, өнерді кеңінен тануға мүмкіндік береді. Жергілікті өнерпаздар мен жас белсенділер осы алаңда өз өнерлерін ортаға салып, көрермендердің ыстық ықыласына бөленді.
Жастардың білімін арттыру мақсатында «Ойлы болсаң озып көр» атты жоғары сынып оқушылары арасында аудандық интеллектуалды сайысы өткізілді. Сонымен қатар Жайылма ауылында «Өнегелі ана, өнерлі қыз» байқауы, Ұ.Сыздықбайұлы ауылында «Fashion show» ұлттық киімдер байқауы, Қазақстан Халықтар Ассамблеясының 30 жылдығына орай Әшір Бүркітбаев ауылында «Алғысым шексіз қасиетті Қазақ еліне» атты этнос өкілдері арасында өнер байқауы, Ұлыстың Ұлы күніне орай алтыбақан аясында салт-дәстүрді насихаттайтын көріністер көрсетілді.
Ауданда ұлттық өнерімізді ұлықтап, жастар арасында күй өнерін кеңінен насихаттауға бағытталған «Күй құдірет-күй кие» аудандық жас күйшілер байқауы өткізілді. Жастарды әскери борышын өтеуге шақыру, патриоттық тәрбие беру мақсатында «Әскерге бару-азаматтық парызың» тақырыбында Жуалы аудандық әскери комитетіне экскурсия және Б.Момышұлының 115 жылдығына орай Жуалы ауданындағы Б.Момышұлының мұражайына жастардың экскурсиясы ұйымдастырылып өткізілді.
Жастар арасында шығармашылықты, достықты және белсенді азаматтық ұстанымды дамыту, оларды ұйымшылдыққа баулу және мәдени әлеуетін арттыру мақсатында Ұлы Жеңістің 80 жылдығына орай Сарысу ауданы Әкімінің кубогі үшін «Жайдарман» ойындары өткізілді. Тараз қаласы және аудандардан 12 команда қатысып, өзара сайысқа түсті. Сондай-ақ «ҚазФосфат» командасы қонақ ретінде қатысып, өнерлерін көрсетті.
Жастар ресурстық орталығы алдағы уақытта да жастардың әлеуметтік, мәдени және кәсіби дамуына бағытталған тың жобаларды жүзеге асыруды жоспарлап отыр. Себебі ел ертеңі-саналы, білімді, белсенді жастардың қолында. Жастар орталығының атқарған жұмыстары-тек жастар үшін ғана емес, тұтас қоғам үшін үлкен үлгі. Еліміздің ертеңі-осындай белсенді, білімді, отансүйгіш жастардың қолында!
Мадина Прімбек,
«Жастар ресурстық орталығының» директоры
