Мемлекет басшысы Қасым-Жомарт Тоқаев игі дәстүрден жаңылмады. Елорда төрінде Парламент палаталарының бірлескен отырысы өтті. Алқалы жиында Президент ел тұрғындарына кезекті Жолдауын жариялады. Биылғы саяси маңызды басқосудың тақырыбы– «Жасанды интеллект дәуіріндегі Қазақстан: Өзекті мәселелер және оны түбегейлі цифрлық өзгерістер арқылы шешу». Заман игілігін пайдалану жаңа мүмкіндіктерге жол ашады. Сол себепті, Президент Жасанды интеллект және цифрлық даму министрлігін құру қажет деп санайды.
Қазақстан Республикасының Президенті Қасым-Жомарт Тоқаевтың Қазақстан халқына арнаған дәстүрлі Жолдауын аудан активі аудан әкімдігінің мәжіліс залында тікелей эфирден тыңдады.
Жолдауды тікелей эфирден тыңдаған аудандық, қалалық ардагерлер кеңесінің мүшелері, аудан әкімдігінің қызметкерлері, аудандағы мекеме және кәсіпорын басшылары алдағы уақытта атқарылатын жұмыстар мен жетістіктерден хабардар болды.
Жолдау аяқталғаннан кейін, аудан әкімі Сәкен Мамытов Мемлекет басшысының Жолдауында белгіленген міндеттерді аудан тұрғындары арасында түсіндіру, насихаттау және бірлесе жүзеге асыру керектігін айтты.
Сәулет Есқара,
«Sarysý»
