Мемлекет басшысы Қасым-Жомарт Тоқаевтың қолдауымен қолға алынған отандық әдебиеттің ең көп оқылатын және сүйікті 100 кітабын анықтау бойынша жалпыұлттық сауалнаманы қолдау мақсатында аудандық орталық кітапхана қызметкерлері «100 кітап» ұлттық сауалнамаға жаңатастықтарды қатысуға шақырды. Сауалнаманың мақсаты-әрбір қазақ оқырманының таңдауы арқылы ұлттық әдебиетті қолдау, отандық авторлардың мәртебесін көтеру, ұрпақты оқуға, ойлауға баулу.
Кітапханашылар халық көп шоғырланатын «Даңқ» монументі алдындағы субұрқақ алаңында қала тұрғындарына ұлттық сауалнаманың мән-маңызын түсіндіріп, таңдаулы деген жүз туындының тізімін жасақтауға атсалысуға шақырып, үнпарақтар таратты. Қала тұрғындары сауалнамаға қатысып, мұндай жобалар ұлттың зияткерлік әлеуетін дамытуға және Қазақстан әдебиетінің рөлін күшейтуге ықпал ететініне сенім білдірді.
К.Сүлейменова,
«Sarysý»
